الجياع ثورتها جاية

الضباب غطى الطريق
والأمل ف القلب مات
كل يوم نازلين غريق
والحاجات تغلا بثبات

والفلوس قيمتها نازلة
والفقير خش ف دوخات
شكلنا هنصوم دهورنا
والأمور صابها انفلات

والجياع ثورتها جاية
نار ونايمة من سكات
واقتصاد عمال يفرفر
باقى يوم يمكن ساعات

والوزارة إيه هتعمل
واللى عبى فلوس وفات
واللى رص الطوب عماير
ساكنة فيها الخفاشات

والمصانع رايحة تقفل
و"صين" بترمى المنتجات
لو بتسأل برضه عنى
هيقولولك كان ومات

الطريق ضلمة ومضلم
وف إيدينا الكشافات
بالعرق والجهد نبنى
والعمل قبل الفوات